Bün grad mit en niege Hüft ut´ Krankenhuus kamen. Dor fragt en Fründ glieks in´n Spaaß: „Na, Uli, un quietscht du nu?“ – QUIETSCHEN deiht dat nich, wiel se mi ja en Nippel to´n Afsmern mit inbuut hebbt. Un ´n Fettpress dorto betahlt de Krankenkass. Schall heten: Quietscht nich. Liekers PIEPEN warrd dat. Wenn ik op´n Flooghaven dörch den Scanner gaht un de Metall-Alarm losgeiht. Denn fangt se achterna mit dat Fummeln an mien Been an … Dormit dat nich dorto kümmt, hebbt se mi en Prothesen-Pass mitgeven, den wies ik vör un se köönt sehn, dat dat keen Metz orrer wat in de Oort is an mien Been.
Dat sünd je man Luxus-Problemen, vun de ik dor vertell. Mi geiht dat ja goot. `N poor Dag is de OP eerst her, un ik kann mi al wedder rögen, in´n Sommer orrer Harfst villicht sogor wedder danzen. Dat is ´n grootortiges Vörankamen in de Medizin! Dank an dat Team un de Dokters vun de Klinik in Groothansdörp! – Kost ja ok wat. Ünnern Strich warrn dat wull an de 20.000 Müüs, de övern Disch gaht. Man de Krankenkass un de Bihölp sünd ja dor. Wi hebbt en goodes Gesundheitswesen.
Denn kann dat ok geern mal piepen bi mi.
So! Un nu laat ik mien wiedere Gedanken mal vun de Lien, un se dörft frie rümspringen: (Is mi egal, dat de Idee al tig-Johr oolt is, liekers leest wi jedeen Dag dorvun in´t Blatt (Zeitung).)
Nich 20.000 sünnern ca 30.000 Dollar kost en SHAHED-Drohn. Kamikaze-Wegsmiet-Drohn. De fleegt över Kiew, Teheran un annerswo. Un wo se daalgaht, starvt Kinner, Fruenslüüd, Mannslüüd un grooten Schaden warrd anricht. – Wat de Kosten anbedrifft, warrd´ noch leger: De pervers „Kosten-Asymmetrie“ – Üm een SHAHED aftoweern, brukst du moderne Systeme as „PATRIOT-Raketen“. De kost Millionen Dollars. Nu laat uns mal heel groff över´n Dumen reken:
(Nee, de Leven vun de Minschen kannst nich reken, dat geiht al mal gor nich!)
1. En SHAHED warrd losjaagt un afschaten = 1,03 Millionen Dollars
2. En SHAHED warrd losjaagt, nich afschaten un sleit in de Wahnungen vun 100 Minschen in: = 1 – 2 Millionen Dollars
Wenn wi blots vun 1 Million Kriegs-Dollar utgaht, sünd dat al mal 50 niege Hüften för Lüüd, de keen Krankenkass hebbt un keen Chance op medizinsch Versorgen hebbt.
In Russland warrd 1000 bet 2700 SHAHED in´n Maand buut; in´n Iran hebbt se minnst 2500 SHAHED in ehr Kellers. Un de Amis buut de SHAHED nu ok. Kopien.
Woans schall ik de Reken nu rünnerbreken för niege Hüftgelenke? De Reken is al schreeg un gräsig noog. Leeg is liekers: Wi brukt Afwehr so as de Swienegel sien Stickels.
Sünst warrd wi opfreten. Kiek mal in´t Blatt! Dor sühst dat jedeen Dag. Man sünd de Stickels billiger as Krieg, de Kinner, Fruenslüüd un Mannslüüd fritt.
Un wenn dat funkschoneert, blifft ok noch wat över för niege Hüften, so as arme Lüüd de ok brukt. Un wenn bi uns´ tokamen Oorloff in de Sekerheetskontrull mien Hüft piept?
Denn denk ik: Moin, dor büst du ja wedder, mien lütt Luxus-Problem!
Beitragsfoto: Pixabay
