Foto: Pixabay
Ja, klor bün ik ok bang. Bang vör KI. Un wat de in Tokunft mit uns anstellen kunn orrer sogor warrd. Kannst ja jedeen Dag in´t Blatt dorvun lesen. Mitünner warrd dat al vergleken mit de Gefohr vun Atomstrom un Atomraketen. Warrd seggt, de KI kunn sik överleggen, se brukt uns Minschen nich mehr un „schalt“ uns eenfach af. Woans se dat makt? Weet ik ok nich. Villicht dreiht se eerstmal Strom un Water af, denn uns´ Kommunikation, dorna duert´ nich mehr lang …
Ja, dat sünd so grulige Drööm. Wenn uns´ tostännigen Lüüd, de Wetenschaap, de Politikers, man blots oppasst!
De Geschichtsböker köönt uns ja wat lehren: Veele Utfinnen [Erfindungen] hebbt sik eerstmal dörchsetten un as goot wiesen müsst. As dat Fotografeeren opkeem, sünd mennig Lüüs bang west, hebbt sogor glöövt, ehr Seel wörr wegnahmen. Un as de eersten Autos dörch de Straaten föhren, hebbt Lüüd, dat dat Düwelswark is. Hüüt kannst doröver smustern, domals weer dat hier un dor ´n Schrecken. Seker is as Bismarck seggt hett: Jedeen Deel geiht swanger mit sien Gegendeel.
So will ik denn mal seggen, dat KI ok vun Nütten [Nützen] is: Föhrst mit dien Auto mal jichtenswo hen, makst ja den Navi-Piloten – mientwegen googlemaps – an. De wiest di meist ´n den besten Weg, sogor ok mal vörbi an´n Stau.
Wullt du wat in´t Internet rechercheeren, fragst du Google un kriggst 100.000 Henwies. KI filtert den besten Henwies oftmals gau rut un hölpt di bi de Söök, wenn du nau seggt hest, wat du söchst.
Un wenn du noch en Schreed wiedergeihst, un giffst Bescheed, wat di ümdrifft, fragt KI sogar na, wat se speziell för di noch dortohölpen kunn. Dat klingt meist as Empathie.
De warrd hochnöödig brukt in de Pleeg. Man is dor oftmals nich noog Tiet för Empathie. „Fachkräftemangel” heet dat. Un nau hier sett de Forschers un Ingeneuren an: De Technik ganz eenfach gestalten, so dat de „Hemmschwell” rünnersett warrd. De Lüüd in de Pleeg schüllt ja nich bang vör de Technik hebben, se schüllt dor Spaaß an hebben. So warrd an „App´s” arbeit, de op de Pleeg tosneden is. Bispeel: Dat gifft een „Tablet” mit blots een App. Dor is blots een „Button”, de warrd drückt, un denn geiht los. „Moin, ik bün Werner KI. Wüllt wi mal ´n beten över dien Kinnertiet snacken? Du hest güstern doch wat vun dien Beleevnis mit dat Peerd seggt. Vertell doch mal, ik hör di to.” (Övrigens: Platt kann de KI al recht goot.) Orrer: „Schüllt wi mal tosamen een ooles Leed singen? Slag mal een vör!”
De Technik is an sik al dor. De Opgaav is nu, se ümtosetten un se an de Lüüd rantobringen.
Oogen to und dörch
Opholn künnt wie eh nix.