Foto: Pixabay
2011 is dat Ohnsorg-Theater vun de „Grote Bleichen” ümtrocken na den Heidi-Kabel-Platz an´n Hauptbahnhof. De Bühn un de Technik sünd aktuell, dat gifft en Gastro-Afdeelen, un de Laag is optimal.
Mit den Ümtog keem frischen Wind in dat Huus: Dormit sünd de Inhoolden un Themen vun de Stücken meent. Wi kennt ja all noch de Stücken as de „Verköffte Grootvadder” mit Henry Vahl und Heidi Kabel. Dor hebbt wi uns bannig mit vergnöögt. De Frag, de de Theaterlüüd un de Besökers bewegt, is liekers: Klamauk un Witze to´n Schenkel-Kloppen un Grölen maken Spaaß. Hett aver den Effekt, dat uns´ Plattdüütsch in een Eck schuuvt warrd. – In een Eck, wo de Spraak nich mehr Eernst nohmen warrd. Un dat is ja nu mal so: Plattdüütsch KANN Eernst. Plattdüütsch KANN kritisch.
So is de anner Karnfrag: De Spraak un dat Arv (Erbe) mütt pleegt un bewohrt warrn – aver wi mütt uns nich versluuten vör niege Ideen un ok to´n Bispeel vör dramatische Themen. Wohen geiht de rechte Weg? 2023 hett dat een landbekannten Striet geven in dat Ohnsorg-Theater. Sogor de Kultursenator Carsten Brosda harr sik as Middelsmann inschalt.
(Mutt dorto seggt warrn, dat de Richungsstriet 2023 sik ok dorüm dreiht hett, woveel Hochdüütsch in dat Programm opnahmen warrn schull.)
Opletzt geiht ja ok dorüm, dat niege un jüngere Lüüd in´n Theater kaamt.
Un wenn wi uns dat aktuelle Programm ankiekt, denn seht wi dat Bemöhen üm plattdüütsch Identität un modern Togänglichkeit:
– Fisch vör veer (Plattdüütsch Krimi-Komödie)
– Wellness is keen Zuckerslicken (Plattdüütsch Komödie)
– Zwerg Nase (Wiehnachtsmärken – hochdüütsch)
– Tratsch op de Trepp (Plattdüütsch Klassiker to Silvester)
– Blootsbröder (Plattdüütsch Musical)
– Die Entdeckung der Currywurst (Plattdüütsch Adaption)
In dat Ohnsorg-Theater gifft dat ok noch en lütte Bühn. Dor loopt oftmals tweespraakig Inszeneerungen.
– Die kleine Dame / de lütte Daam
– Altes Land (Na den Roman vun Dörte Hansen)
– Novecento – de Geschicht vun den Ozeanpianisten
– Das doppelte Lottchen / Duppelt höllt beter (Na Erich Kästner)
Is för jedeen wat dorbi. Laat uns mal wedder in´n Theater gahn!
