Foto: Pixabay
… un hier is dat Rezept för den Welt-Freden opsteeds: IK DO DI NIX! – UN DU DEIHST MI NIX!
ZACK! Un foorts is de Freden dor. Wenn sik all doran hoolt. Blots schaad, datt dat in uns´ Welt oftmals anners togeiht: De en nemmt sik wat rut, wat de annern to wiet geiht. Un dor hebbt wi glieks de Anfang vun Striet. Düsse eenfache Philosphie warrd ok besungen in den Titelsong vun de TV-Serie „Großstadt-Revíer“. (Truck Stop, en Hamborger Country-Band) Liekers, Harmonie gifft dat doch hier un dor: Nemmt wi mal goote Navern. Beid laat se sik in Roh, snackt mit´nanner, leevt mit´nanner. Dor deiht sik ´n Ruum op twüschen de beiden Navern. „Moin, wat is los mit die Auto? Kann ik di hölpen?“ So kümmt dat villicht, dat se nich blots tosamen snackt, se makt ok wat tosamen. Orrer anners: „Moin! Kiek mal hier, ik heff grad Fisch rökert. Mehr as wi sülven eten köönt. Wüllt ji twee afhebben?“ So kümmt dat villicht, dat se ok tosamen eet, wiel de anner je noch noog to drinken dor hett. Tja, so kunn´t ok in de groote Politik funkschoneeren. Wokeen seegt un verkloort dat aver de mächtigen Lüüd? Also, ween du mi fragst, ik wörr Trump ´n lütten Zettel vörbereiten. Den brukt he blots vör-to-lesen: Moin, ji Iraners, wi wüllt ju Öl köpen, wat holt ji dorvun? Un denn wörr ik de Iraners ´n lütten Zettel hinleggen. Den brukt se blots vör-to-lesen: Moin, ji Amis! Kann losgahn! Wi makt ju ´n gooten Pries. Köönt ji uns denn ´n poor niege Krankenhüüs un Schoolen dor optogeven? So kunn dat ´n DEAL warrn. Schaad: Mi fragt je keeneen.
