Uns‘ Naver un Fründ Albert is je so’n „Allround-Typ“, as man seggen deiht. He kann mit Iesen, Maschinen, Holt, Strom, Fischfang, Bootföhren un sien Gorrn ümgahn, as wenn he för allens in de Lehr gahn weer. Un snacken kannst du mit em över Themen mit Deepgang, so as över dat Leven vun sien Neffen mit Down-Syndrom, grad so as ok mit em tosamen Lachen över Schenkel-Klopper-Witze.
Woans mag dat herkamen, dat bi welk (bei manchen) Lüüd so as bi uns Naver Albert so veele Talente ünnerkrupen kunnen. Liggt dat alleen an de Gene? – Glööv ik nich, dat dat alleen dorvun kümmt. Albert is jümmers mit apen Ogen, apen Ohren un mit en apen Hart op de Minschen togahn. So kunn he veel opnemmen un lehren, so hett he veel wieder- un torüchgeven. Schall heten: Uttusch (Austausch) vun Kompetenzen un Erfahrungen un Uttusch vun Weltansichten.
Anners löppt dat mitünner bi de sonöhmt (sogenannten) „Spezialisten“. – Dorto will ierstmal den lütten Witz vun de dree Handwarkers vertellen, de jedeen as dull vun sik sülven övertüügt sünd:
Dree Handwarkers sitt tosamen un striet ik, wokeen (wer) den öllsten Beruf hett.
De Murer sleit op’n Disch un seggt: „Wi! Wi Murers hebbt al de Pyramiden vun de Pharonen buut!“
De Gorrner (Gärtner) steiht op un seggt: „Wi! Wi! Kiekt mal den Gorrn Eden, dat Paradies! Dor hebbt wi all de Bööm plant un de Blomenbeten anleggt!“
De Elektriker lehnt sik torüch un smustergrient: „Tja, as uns groote Herrgott see (sagte) ES WERDE LICHT! – Dor harrn wi al lang de Leitungen verleggt hatt.“
Na! Un so warrd je ok faken (oft) över en wunnerlichen Minschen seggt: „He is je ok nu mal en Spezialist!“ Villicht, wiel he de annern Lüüd nich tohört un se nich ankiekt, blots sien egen Kram in’n Kopp hett.
Wi all kennt Spezialisten för Minschenverachten, Spezialisten för Kriegsdrieverie, Machtgier: Trump, Putin un Co. Se hebbt keen Ahnung vun Respekt, Gedüür, vun de Leev.
Dor lööv ik mi Helmut Schmidt. He hett in sien egen Huus mit Breshnew in den „Bergedorfer Gesprächskreis“ an en Disch tosamenseten, he hett Schach speelt, Klaviermusik makt un segelt. He hett Kultur leevt.
Dat Ideal för en Minschen in de Renaissance-Tiet weer dat „Universalgenie“. Leonardo da Vinci, mientwegen. Un laterhin Albert Einstein hett nich blots siene Theorie entwickelt, he hett ok de Minschen ankeken un veel Sinniges seggt.
Un wenn ik mi wünsch, dat Trump un Co sik ’n Schiev dorvun afsnied, denn is dat to laat. Naivet Wünschen. To laat.
Ahn (ohne) Bilden, Kultur un Leev kriegt wi de Quittung: Rüpel un Monster an de Regeren.
Wi brukt mehr Alberts. Egal, of se Einstein heet orrer uns Naver sünd.
Sehr schöön, Uli, du hest, as man so seggt, op amüsante Wies den Nagel op den Kopp drapen.