Foto: Pixabay
Weerte Tokiekers un Tohörers, vun uns hier ut uns´ Studio in´n NDR en hartlich MOIN! Düt is uns 75te PLATTTALK-Sennen, hüüt is de 25. Januarmaand 2041. Mien Naam is Franziska Fragman, un ik frei mi, dat ik hier wedder modereeren dörf. Un denn kaamt wi ok glieks to uns´ Gast: Moin, Yared Dibaba, Präsident vun de Organisatschon „Platt regeert de Welt!“
Dibaba: Moin, Fru Fragman!
Fragman: Herr Dibaba, nu is dat all siet ´n poor Johrn so, dat de Welt platt regeert warrd. Kunnen Se as Präsident uns noch mal´n korten Torüchblick geven, woans dat allens in so korte Tiet opkamen kunn? Ik meen, „Platt regeert de Welt“ – dat is ja
hüüt uns´ Saak un Thema.
Didaba: Ja, nu: In de Johrn 2025 un 2026 un ok dovör leeg de Welt ja rein verdweer un verdwars. Putin harr sien Suldaten mit Panzers na de Ukraine schick un allns tweischeeten laten; Xi, de kunn sien Poten nich vun Taiwan laten; un denn: Trump, Trump un noch mal Trump! – Venezuela, Iran un Grönland! Gar nich dorvun to snacken, woans he mit sien egen Lüüd in sien „Great America“ umgahn dee, dorto gifft dat gar keen plattdüütsch Woort – Fremdschämen“. Na! Un so hebbt wi Plattdüütschen denn seggt: Dor mütt wi wat an dreihen, so geiht´ nich wieder!
Fragman: Jo, dat weer de Anfang. – Denn wörrn wi ja ok noch giern weten, woans ji dat anstellt hebbt: Wat weern juun Methoden, wat weer juun Strategie PLATT so gau un so wiet na vörn to to bringen, dat sodennig nu uns´ Welt regeert warrd?
Dibaba: Tja, de Saak harr, so as dat faken is, ´n sworen Begünn. Toeerst müssen wi Agenten utbillen. Agenten, de Platt-Engelsch, de Platt-Russ´sch, de Platt-Chineesch snacken kunnen. Dat weer för´t Eerst een Geheem-Operatschon. Dorbi hett uns de Finkwarder-Speeldeel bannig holpen. Wi dörften de heele Utbillen in ehr Proovrüüm dörchtrecken.
Fragman: Aha! Dat hett een ja so gor nich wüsst. Man, weer ja ok geheem. Un woans güng dat denn wieder?
Dibaba: De neegst Schritt weer dat Rinslüsen. Uns´ Agenten bröchen wi in de Schalt- Zentralen ünner: In dat Witte Huus, in den Kreml den Zhongnanhai, wo Xi in Peking regeeren deit.
Fragmann: Na, goot. – dormit harrn´s ja man liekers noch keen Infloot, wull ik meenen.
Dibaba: Na, tööv man af! Wi Norddüütschen hebbt ja Gedüür! Uns´ Agenten hebbt arbeidt un dorbi suutje uns` plattddüütsch Denken un Föhlen, uns´ plattdüütsch Mentalität infiltreert. – Stünn dor to´n Bispeel mal wedder de Frag na een niegen Krieg op´n Plan, denn see uns Agent de weer ja intwüschen Baas-Raatgever för Präsidenten, denn see de so as: Löppt sik ok trech! Lat de Panzers man stahn! Orrer: Lat goot ween! Un so wieder un so wieder. Dor wi ja veele, veele Snacks, de wiest, dat dat is, wenn een de Roh weghett. Un mehr un mehr hebbt de Wootköpp un Bullerballers as Trump un Co sik besunnen. Opletzt, dat freit uns ja nu all sünd de Raatgevers worrn. Un Fruenslüüd sünd ok dorbi, klor.
Fragman: Dat is so scheun lopen, beter geiht wull nich. Hebbt ji denn ok af un an mal Problemen hatt? Villicht mögen Se mal vun een vertelln?
Dibaba: Tja, dor fallt mi dat mit de Inders in: Dat güng üm dat Leed vun Herrn Pastor sien Koh. Dor wulln se partout nich mitsingen. Klor, dat wi seggt hebbt Mutt ja nich! Dor mutt sik ok keen een griese Hoor över wassen laten. Kiek mi an. Heff ik je nich makt.
Fragman: Mann, Herr Dibaba! Dat hebbt ji fein hinkregen! Un so schall dat man wiedergahn! Een Applaus vun uns´n Tokiekers!
Un nu, leeve Tokiekers, kaamt wi noch to uns` Show-Deel: En Pantomime in`t Düstern. Pantomime Licht. Hett dat so noch gor nich geven. Dat is en Een-Minuten- Stück. Un dat heet: „Trump!“ Snackt warrd bi düsse Pantomime ok eenmal, soveel kann ik ju verraden: De enkelte Satz heet: „He is ´n Mors!“
