Foto: Pixabay
„Eerst wo de Minsch speelt, dor is he richtig Minsch!“ Dat hett (op hochdüütsch) bekanntlich Schiller seggt. Un dat stimmt ok. Eernst un Spaaß liggt gliek op, je, woveel Ehrgiez rin stickt warrd. Bi Boule un Boccia geiht dat goot: Spaaß, Ernst un denn ok noch Gemeenschapp för lau. Boule kümmt ut Frankriek un warrd mit Metall-Kugeln in ünnerscheedlich Oorten speelt.
Boccia ut Italien, veelmals mit Kugeln ut Plastik. [Ik meen, de Kugeln ut Metall makt mehr Spaaß, een Set kannst twüschen 25 un 35 Euro köpen.] Wenn du nau na de Regeln speelen wullst, söök di de ut´ Internet!
Hier sünd de Regeln ganz eenfach opföhrt:
* Twee Speeler speelt gegeneenanner. (Orrer 2 vs 2, 3 vs 3)
* De Maalkugel (Zielkugel = „Schweinchen“, seggt wi op platt mal „Puttfarken“) warrd achtern op de Bahn smeten.
* Nu geiht dat Smieten los. Afwesselnd smiet de Gegenparten ehr Kugeln. So as dat geiht, dicht an dat „Puttfarken“. Dorbi kannst ok de annern Kugeln, de al goot liggt, wegstöten.
* Wokeen an´n Enn een vun sien Kugeln gliek neven dat Puttfarken to liggen hett, kriggt Punkten.
[Wokeen dat denn nau nemmt, hett ´n Maatband inne Tasch.]
* Wokeen 13 Punkten hett, de hett de Runn wunnen. – Gratulatschon!
So! Nu kümmt dat Best: Klor, kannst dat in`n Gorrn op´n Rasen speelen. Aver wat makst du, wenn du blots mal speelen wullst, aver nich de Annern tohus hebben wullst, de sik dor dörchfreet un dörchsuupt? Denn makt ji ´n Termin af: Achter uns´ oole School, blank bi uns´ Rathuus, dor gifft dat een Boule-Bahn! Dor köönt ji hengahn! Kostnix! Nu stell ik mi vör: Dat geev mal in´t tokamen Johr een Wettstriet för de WendörperInnen! Dat Startgeld geiht to´n Bispeel an de Jugendarbeet vun de Füerwehr. De WinnerIn kriggt ne Buddel gooten Bordeaux. Un se/he is de Wendörper Boule-Champion 2027! Ik wörr dor mitmaken.
Foto: Pixabay
