Foto: Pixabay
Max : Moin, Moritz! Ik heff ´n niegen Hansbunkentöög! (Lausbubenstreich)
Moritz : Ja, vertell, wat köönt wi opstellen?
Max : Wi stapelt ´n Komposthupen up.
Moritz : Wat sünd dat denn för Töög? Büst du mall worrn?
Max : Nä, gor nich! Wi stapelt ´n Komposthupen op. In den Naver sien Gorrn.
Moritz : Grapen hest du in dien Kopp! Un denn? Denn freit he sik dor över, orrer wat!
Max : Ja, denn freit he sik. LIE-KERS – schallst mal sehen: `N poor Weken later. Weetst, wat
denn los is?
Moritz : Tja, denn wasst dor ´n fein Körbs op, un he freit sik noch mehr. Mann, Mann, wat ´n
Schiet-Idee!
Max : Dat mag ja ween, dat mit den Körbs. Man nu kümmt de Spätzünder: `N Danz warrd dat!
De Rotten warrd danzen! In den Komposthupen, op den Komposthupen un üm den
Komposthupen rüm! Denn: Wi hebbt ja den Maschendraht vergeten! Un wi hebbt orntlich Knaken un Fleesch vun de Weetfru Bolte ehrn Höhner dormit ropsmeeten. Dor kaamt de
Rotten gauer anscheten as du kieken kannst!
Wat! Warrd! Wi! Uns! Högen!
Moritz : Max – ik will di mal wat seggen: Dien Idee is nich so slecht, gor nich.
Schaad is, dat dat anners is: De Rotten danzt doch al överall in uns´ Gemeen. Un in anner
Gemeenen ok.
Liggt doran, dat de Lüüd ehr To-Go-Eten vun McBääh op de Eerd fallen laat, dat de Lüüd
ehrn Affall nich orntlich in de Tünn steekt, dat de Lüüd dat Fodern vun de Vageln nich
laten köönt. Woneem de Minschen sik as de Swien opföhrt, dor kaamt de Rotten. Dat is al
jümmers so west.
