Foto: Pixabay
[Wokeen düssen Text toend list, kriggt achteran en Belohnen: Dor gifft dat Musik to hören.]
365 Daag hett dat Johr. Un an een Dag hest du Geburtsdag. An sik de wichtigst Dag in dien Leven. De Minschen, de di leev hebbt, graleert di und fiert mit di. Dat di dat gifft. Un dat is goot so. Wiel dat överall so hoch holen warrd, gifft dat ok Brüük, de as bekannt pleegt warrd. Karsen ansteken un utpusten, Koken eten, Geschenke mitbringen und wat nich noch. Vör alln: Wo Minschen tosamenkaamt, dor singt se. Männich Leeder sünd op de heele Welt bekannt. „Happy birthday!“, „Veel Glück un veel Segen“ un , na klor, bi uns „Wo scheun, dat du born büst“ vun Rolf Zuckowski sünd welk vun de bekanntesten. För mi is dat vun Zuckowski dat scheunste; man – in 40 Johrn as Grundschoolmester hefft ik dat bannig veelmals sungen … Un „Happy birthday!“ – Dat kannst al in Gröten-Koorten as „Audio“ kriegen. (Klappst de Koort op, fangt dat Leed an to dudeln.) Orrer in een Plastik-Bloom: Faatst de Blööt an, dudelt „Happy birthday“. Op dudeln riemelt sik nudeln – Mitünner meen ik, dat is denn ok al afnudelt, so oft kriggst dat Leed to hören, ok wenn dor gor keen een Geburtsdag hett in dien Neegde.
Nu fallt mi „Alice in´t Wunnerland“ in. Dat is ja een afsünnerlich Vertellen mit snaaksche Gedanken. In de een Episood geiht dat so, dat een seggt: Wat schall ik blots eenmal in´t Johr Geburtsdag fiern? Dat Johr hett ja noch 364 annere Daag; denn kann ik je 364 mal „Nich-Geburtsdag“ fiern! Un grad in de Verfilmen vun Walt Disney makt se dat ok. 364 mal Nich-Geburtsdag fiern. Wat´n afnudeltet Överdriven!
Aver so is dat mit Överdriven in de Literatur: So markt de Lesers eerst mal op, so fangt se villicht an to denken – wat kunn je noch dor achter so´n Idee steken? Kiekst du achter den Spegel, denn kannst ok so verstahn:
För jedeen Minschen is dat beter, wenn he jedeen Dag in´n Johr Towennen (Zuwendung) kriggt.
[Wat heet eegentlich WERTSCHÄTZEN op platt? Hochachten, Ästimeren steiht in den SASS.]
Mutt ja nich forts de grote Party ween. Is ja al veel, wenn en FründIn to di seggt: Moin, woans geiht di dat? Bedrückt di wat? Kannst di bi mi utweenen, wenn dat leeg is.
Orrer: Scheun, wenn alln´s in Bodder is! Laat uns ´n beten singen, dat geiht ok an en griesen Maandag. Hauptsaak, wi kiekt uns mal wedder in de Oogen un hoolt uns in de Arms.
Dorto gifft dat ok en Leed: LINK to dat Leed: „364“