Wenn du old warrst-is so´n Saak. Man wenn jünger Lüüd di noch öller makt as du al büst, denn is dat noch´n anner Saak: Bün ik nülich mal wedder in´n Bumarkt west. Dor wull ik mi OSB-Platten tosnieden laten. Ik müss töven. Weern noch anner Kunnen vör mi. Dat weern twee junge Lüüd. Jungen Mann un´n junge Fru. De werrn – as man an ehr Kledaasch sehn kunn – Surfer. So as ik sülven ok Surfer west bün. (Is aver al ´n poor Johrn her.) Un so keemen wi denn in´t Gesprääk. – Se wullen sik een Liest tosnieden laten. Över dat Bett an de Wand to hangen, un dor an denn Telgen (Zweige) antobummeln. Süht romantisch ut, ut meenen se. Se wullen ehr „Nest“ fein un püük maken. „Tja“, see ik, „mien Surfertiet is al vörbi. Domals heff ik mien Surf-Breed sülven buut. Hett bannig Spaß makt, dat Klütern.“ – „Ja, wie denn“, fröggt de jung Mann, „noch aus Holz, damals?“ Dor müss ik smustergrienen un anter: „Nä, dat wull nich. De Steentiet is al vörbi. Un EINBÄUME snittjert ok keen mehr. Hier tominnst nich. Ik heff en Block Styrodur namen, de Kurven mit den Taschenrekner utrekent. (Computers geev dat ja noch nich.) Denn de Form SHAPED, as man seggen deiht, un dorna laminiert. Epoxyd un Glasfaser. De U-Kanten as 6-fach Stringer makt un Carbonfasern as Tosatz-Stringer introcken. 1 Tracker-Finn Stbd denn as Semi-Assymetrical. 1-Foot-off 30 cm. 9 kg wöög dat Deel man blots un lööp goot in de Brandung. – Wat hest du denn vör en Brett?“ „Jaa“, see he, „weiß nicht, 2-Meter-Sechzig ist das wohl lang. Hab ich im Laden gekauft.“
Beitragsfoto: Pixabay
