De Sommertied (En Kolumne mit Musik)
… is en scheune un warme Tied. So wüllt wi dat giern hebben.
– Man düsse Daag, Maande un Johrn sünd nich för all Minschen so:
Krisen, Krieg, Kriegsverbreken. Ukraine, Iran sünd blots Bispelen. Leege Bispelen.
Ünnerdrücken – dat löppt al siet mehr as dusend Johrn. Pharaonen hebbt dor ehrn „Spaaß“ an hatt; nu un aktuell meent Putin un so ok Trump, se kunnen Wahnsinn leven as de Surfers op de Bülgen (Wellen) vör Hawaii.
Ik glööv, dat se ok wohrhaftig wahnsinnig sünd.
In South Carolina, USA, speelt de Oper „Porgy and Bess“ vun Gershwin. Dat geiht üm dat Leven in dat Ümfeld vun de swatten Minschen, de dor ok ünnerdrückt worrn sünd. 1935 hebbt se de Oper to´n iersten Mal opföhrt.
In Düütschland ierstmal nich. Dor hebbt de Nazis düsse Oort vun Kunst glieks verboden. Zack!
De bekannteste Arie ut de Oper is dat Wegenleed „Summertime“. – Un de kannst ok so verstahn: Ünnerdrücken un Krieg warrd DAT nie nich tweimaken:
De Leev vun Mudder un Vadder to ehr Kind.
Beitragsfoto: Pixabay/Musik: Uli Gröhn
