Die Plattdeutsche Kolumne von Uli Gröhn: Un Achim hett dat Paradies sehn

1943 in´n Julimaand un laterhin hebbt se Hamborg utbombt. Operation „Gomorrha“. 750.000 Minschen harrn op´n Slag keen Hüsung mehr. Veele keemen denn in`t Ümland ünner. So ok in uns´ Wendörp: Dor hett – blang veele annere Lüüd – een Familie Ünnerkruup funnen, de hett Reichel heten. Un se keemen ut St. Pauli. Dat weer een Seefohrer-Familie. De Fru, schall heten Fru Reichel, weer swanger worrn, un in 1944 wörr ehr Söhn Achim boren. Achim Reichel. So heet he hüüt ok noch.
As de Krieg vörbi weer, is Familie Reichel na een poor Johr wedder torüchtrocken na St. Pauli. Un dor is Achim Reichel denn opwussen. Laterhin hett he Kellner lehrt; un as wi all weet, is he ´n düchtigen Musiker worrn.
Liekers: Boren is he in Wendörp; he is ´n Wendörper Jung.
Dat he Talent harr, wörr heel Düütschland bald wiss. Siene Band, de „Rattles“ hebbt mennig Lüüd de „Düütschen Beatles“ nöömt. – Johren later, as „Solist“, is Achim bigahn un hett oole Shanties, de domals ´n beten ut de Mood weeren, mit sien Rock-Musik in eenen Putt smeten. Un dorut „Rock-Shanties makt. So hett he veele Shanties een niegen Swung geven. De Lüüd harrn dor wedder Freid an.
Sien beröhmtesten Shanty hett he sülven schrewen: „Aloha-hea-he!“. Dat Leed weer in de düütschen Hitlisten, – un ´n poor Johr later – schier verrückt – denn ok noch mal in de Chinesische Hitlist! (Du kannst wull dorvun utgahn, dat se nich all den Text över de Seefohrer-Romantik verstahn hebbt, man: Wat dit scheune Leed vertellt, dat kannst an den Rhythmus un an de Melodie föhlen!) Wat ok mit dit Leed verbunnen is: „Dröög-Rodern“ – Wenn een op een Party de Luun hochgeiht un dat Leed speelt warrd, denn sett sik de Lüüd op den Danz-Böhn un rodert un rodert un hebbt Spaaß. Ok in Holland kennt se dat goot.
Na! Un Achim Reichel hett sik bannig freit, dat sien Musik denn ok in China ankeem.
Een Reeg ut sien Hit geiht so: „Ich hab das Paradies gesehn, es war um 1910.“
Un so heet ok Achims Biografie: „Ich hab das Paradies gesehn!“
Liekers: Dor geiht nix dorvun af: Achim is ´n Wendörper Jung!
(As Bäcker Flindt noch in uns´ Dörp togang weer, hett he ja ´n poor vun siene Rundstücken ok so nöömt. Of he dor wull Achim Reichel in´n Sinn hat hett?)

Beitragsfoto: Pixabay