„MASROOHEG“ dat is een Woort, dat du hüüttodags meist gor nich mehr in´n Mund nemmen schallst? Ok, wenn du dat torüchwarts – richtig – leest.
Ganz flink sünd mennig Lüüd op ´n Plan un treckt Parallelen to tappendüüster Tieden as vör över 70 Johren un achteran: „Mitlöper“! „Blind Pareeren“! (= „Kadavergehorsam“)
Wohen uns dat bröcht hett, dat weet wi all. – Müssen wi för jedeen Offer (= Opfer) vun den Holocaust 1 Minut swiegen, weer uns´ Welt 11 Johr dodenstill.
1. Man will ik ok seggen, dat ik bi de Marine deent heff: Bi de Bundeswehr gellt „Befehl und Gehorsam“. (Solang de Befehl nich gegen ethische Grundsätz verstött.) Sünst funkschioneert de Apparat nich.
2. Un noch will ik seggen: Ik bün Segler. An Bord gellt: De Skipper seggt an, de Crew makt. – Dor gifft dat keen Diskuteern. Sünst löppt dat Schipp gauer op Schiet as du kieken kannst.
3. Drüttens: Bün Pädagog west. Un dor hebbt se mi in de 90er Johren mal op de Fingers kloppt. Dat weer in de Johren, as we vun de „Tallteken-Tügnissen“ (Ziffern-Zeugnisse) afkeemen schullen un Texten schriewen schullen. Woans de Kinners ehrn Lehrnweg sik so gestalten dee. Un dat schull dörchweg „bestärkend“ ween. Is ja ok goot, wenn Kinner löövt warrd. Weet wi ja all. – Na! Un ik harr nu liekers schrewen, dat dat Kind XY in de stillen Phasen vun dat Lehren nich dörch de Klass lopen schull un de annern Kinner nich ehr Saken wegnemmen schull. Un dat he dat ok dee, ofgliek wi, de Schoolmeesters, dat ünnerseggt harrn. – Wi hebbt seggt: „NEE! XY! Hör op dormit un sett di daal!“ Un he/se dee dat nich. – Un denn heff ik in dat Tügniss schrewen, dat dat Kind sik af un an nich de Regeln hölt. Laterhin – in dat Öllern-Gesprääk hebbt se mi seggt: „Wir erziehen unser Kind demokratisch!“ Un opletzt heff ik mien Tügniss-Texten ännern müsst. Kannst glöven, musst nich glöven. Weer aver so.
4. Annersiets – un ok noch: Bi de ganz lütten Kinner gellt dat Beschirmen (Beschützen/Behüten). Wenn dien Kind orrer dien Enkel na de Steckdoos henkrupen deiht un dor mit sien klammen Fingers rümfummelt, heet dat NEE! Un wenn dat Kind denn ni hören kann, passeert `n groot Malöör.
So! Nu noch mal wedder anners dacht: Dat gifft Plichten, un dat gifft ok Rechten. Un de sünd beid to bedenken un aftowegen. Uns´ Demokratie, op de wi so stolt sünd. Wat is mit de Demokratie in USA los, grad dor, wo se angeblich doch utklamüstert worrn is? Jedeen Dag seht wi dat in´t TV orrer lest in de Press, dat de Demokratie dor mit Fööt perd ward. Kiekt wi mal na Minneapolis: Schüllt de Lüüd dor seggen „Och, süh, de ICE wiest ehr Gesicht nich – grad so as Batman orrer Zorro – aver uns Inwahners dörft se afscheten as dullsüük Vöss (= tollwütige Füchse).“ ? Geiht nix mehr mit Gehorsam? Nee! Nu is dor „ZIVILEN UNGEHORSAM“ fragt. Wenn, tja, wenn sik all Minschen demokratisch holen wörrn, denn bruken wi dor gor keen Diskuschoon üm maken. So eenfach weer dat: Jeedeen besinnt sik op sien Rechten un Plichten. (Ok de GROOTEN vun uns´ Welt!) Un seggt: Jeedeen hett sien Freeheit; un de is dor to Enn, wo de Freeheit vun den Annern anfangt. „Gehoorsam“ is denn nich mehr as dat Beachten vun Regeln. Un dat klingt glieks suutje.
Beitragsfoto: Pixabay